FÂTİH DERSİ’ÂM-I MUCÎZLERİNDEN
MERHÛM ŞEVKET EFENDİ
Şevket Efendi on üçüncü karn-ı hicrîde zuhûr eden ulemâ-yı Devlet-i Aliyye’nin ekâbir-i meşâhirindendir. Genç iken vefât etmişse de, cihân-ı ulûmu, ta’lîm ve tedrîs ile ihyâ
etti. Efâzıl-ı asırdan nice zevât-ı meşhûre onun telâmîz-i ilm
ü irfânıdır. Darü’l-hilâfeti’l-aliyye’de bugün rahle-nişîn-i ifâde bulunan dersi’âmlardan pek çoklarının icâzet-nâmeleri
müşârun-ileyhin ismiyle müveşşahdır. Silsile-i füyûz-ı kemâlâtı halefen an selef ricâl-i istikbâle doğru uzanıp gidiyor.
Sâhib-i tercüme –rahimehullah- evkāt-ı hayâtını tedrîs-i
ulûma vakf eylemiş olduğundan kemalât-ı ilmiyye nisbetinde başlıca âsâr-ı kebîre tahrîrine vakit bulamamıştır. Fakat
fünûn-ı şettâya dâir cevâmi’ ve medârisde sıra dersleri olarak okunan kütüb ve mü’ellefât-ı mu’teberenin hemen kâffesine pek dakīk ve amîk mütâla’âtı hâvî hâmişler yazmış ve
bazı resâ’il-i müteferrika te’lîf etmiştir. Hevamiş yazdığı kitabların ekserîsi defâ’atle tab’ [6] olunarak talebe-i ulûmun
eydî-i mütâla’asında tedâvül etmekde olduğu gibi risâleler
dahi zînet-ârâ-yı destgâh-ı temsîl olmuştur.
Müşârun-ileyh hilye-i rıfk u takvâ ile tezyîn-i zât u sıfât
eylemişti. Zât-ı Hazret-i Akdes’e müte’allik mesâ’il-i ’âliyyeyi
ve sıdk u istikāmete mütedâir mebâhis-i celîleyi takrîr ettiği
esnâda şevk-i hakīkat ve kemâl-i havf u haşyet ile kalbi teheyyüc eder ve çok kere olur idi ki gözleri yaşarır idi. Hâlâ
unutamam: Bir gün usûl-i hadîsden “Dâvud el-Kayserî” okutur iken sahâbe-i kirâmın: “Yâ Resûlallah! Zât-ı risâletme’âbınıza şeyb pek çabuk hulûl etti!..” demeleriyle mişkât-ı
sadr-ı nübüvvetden 1
(هود سورة شيبتنى (sâdır olmuş ve sûre-i şerîfenin ne ciheti buna bâ’is olduğunu tekrar su’âl ettiklerinde 2
(َتْرِمُأ اَمَكْ مِقَتْاسَف (emri tesrî’-i şeyb eylediği beyân buyurulmuş diye takrîr ettiği sırada, kendini zabt edemeyip bükâ
etdi ve halka-i tedrîse beht ü te’essür istilâ eylemekle ifâde
ve istifâde birkaç dakīka munkatı’ oldukdan sonra o gün artık dersi ikmâl edemedi. Bu hâl-i incizâb Kādî Beydâvî Tefsîri’ni okuttuğu zamanlarda da bir iki kere kendisinde zuhûr
eylemiş idi.
Şevket Efendi 1253 târîhinde Dersa’âdet’de dünyaya
gelmiştir. İsmi Mustafa ve pederi Tabîb Miralayı Mütercim
Sâlih Rıfkı Bey’dir. İbtidâ’ İstanbul’da Avratpazarı’nda
Hamdi Efendi Mektebi’nde okudu ve pederinden Farisî ile
Arabî sarf ve nahvine dâir bazı mebâdî-i ulûm gördü. Bin
ikiyüz altmış beş senesinde ol vakit mekâtib-i âliye-i devletden ma’dûd bulunan “Mekteb-i Ma’ârif-i Adliyye”ye duhûl
etti. Mekteb-i mezkûru ikmâl etmesiyle 70 târîhinde ba-ru’-
ûs-i hümâyûn Meclis-i Vâlâ Mazbata Odası’na me’mûr oldu.
Bir müddet Mazbata Odası’na devam ile beraber diğer
tarafdan da Bâyezîd Câmi’-i Şerîfi’nde bazı esâtizenin dersine hâzır olmuş idi. Sonra her ikisini terk ve tebdîl-i câme
ederek zamanının ecille-i ulemâsından ve Fâtih dersi’âm-
1 Tirmizî, Sünen, Bâbu’t-Tefsîr, Sûretu’l-Vâkı’a. 2 Hûd, 11/112.
larından merhûm Karînâbâdî Abdurrahman Efendi’nin*
halka-i tedrîsine dâhil olmuş ve 79 senesi Receb’inde müşârun-ileyh Abdurrahman Efendi’den icâzet almıştır. Târîh-i icâzetden dokuz mâh evvel 78 senesinde Ebulfeth ve’l-Megâzî Sultan Mehmed Hân-ı Sânî hazretleri câmi’-i nûr-lâmi’inde üstâdının yerine Kâfiye Şerhi Molla Câmi’den derse
çıktı.
Merhûm-ı müşârun-ileyh 1277 senesinde bi’l-imtihân
tarîk kadılığına ve mu’ahharan ru’ûs mülâzemetine nâ’il
olduğu gibi 1280 târîhinde dâire-i fetevâ-penâhîde küşâd
olunan ru’ûs imtihân-ı kebîrine dahi dâhil olup nâ’il-i ru’ûs
olan yüz yirmi kadar zevât içinde birinci çıktı. O târîhe kadar akrân ve emsâli arasına münhasır bulunan âvâze-i şöhreti birden bire pek parlak sûretde her tarafa yayılarak artık
Şevket Efendi nâmı ma’lûm-ı enâm oldu.
Zikr olunan 1280 senesinde uhde-i istihkākına ibtidâ-i
hâric, 81’de hareket-i hâric, 83’de ibtidâ-i dâhil, 84’de hareket-i dâhil, 85 Receb’inde Mûsıla-i Sahn, sene-i mezkûre
Şevvâl’inde ibtidâ Altmışlı rütbeleri, sene-i mezkûre Zilhiccesi’nde İzmir, 89’da Edirne, 90 târîhinde Üçüncü rütbeden
Mecidî nişanıyla Harameyn-i Muhteremeyn pâyeleri tevcîh
ve ihsân olundu. Ve 85’de Dîvân-ı Ahkâm-ı Adliye’ye a’zâ
ta’yin buyurulmuş idi. Mu’ahharan dîvan-ı mezkûrun lağvı
üzerine Meclis-i Tedkīkāt-ı Şer’iyye a’zâlığına tahvîl-i me’-
mûriyet eyledi. Dîvân-ı Ahkâm’da iken bazı husûsât hakkındaki mütâla’âtını mübeyyin yazdığı lâyihalar Âlî Paşa’nın
pek mazhar-ı takdîri olur idi. Kānûn-ı cezâ mevâddının ahkâm ve siyâsiyyât-ı şer’iyyeye tatbîkine âid mülâhazâtını
kānûn-ı mezkûrun etrafına hevâmiş sûretinde tahrîr etmişse
de vefâtında bu tahşiyeleri muhtevî bulunan nüsha-i kānûn
diğer kütüb-i nefîse ile birlikde terekesinden satılmış ve kimin yed-i temlîkinde bulunduğu hâlâ anlaşılamamıştır.
Merhûm-ı müşârun-ileyh sinn ü meslekçe kendine akrân
bulunan bazı zevâta okuttuğu derslerden başka yüz elliden
mütecâviz telâmizîne her gün sıra dersleri ve Bâyezîd ve Süleymâniye talebesine varıncaya kadar diğer müte’allimîne
dahi kendi telâmîziyle birlikde ikindi ve ta’tîl dersleri okutmak üzere on üç seneden ziyâde müntehî dersler talebesine
mahsûs ulûm-ı şettâ müzâkere ve tedris ile uğraşmış ve âdetâ kişver-i ulûmda cihad eylemiştir. Bu kadar müddet şebân
ü rûzân bilâ-fasıla devam eden mütâla’a ve tedrîsden vücûduna pek vehn ü za’af târî olmakla en-nihâye mübtelâ olduğu baş ağrısından ifâkat bulamayarak 1291 senesi Muharremülharam’ının yirmi ikinci Cum’a gecesi revân-ı pâki
âlem-i illiyyine pervâz etdi.
Daha nice zaman temâdî-i füyûzuna intizâr olunmakda
iken sinîn-i hayatının hemen otuz sekizinci sâlinde âlem-i
fânîye vedâ eden o fâzıl-ı bî-hemtânın vefâtı duyulmasıyla
Fâtih’de seng-i musallâdan karakolhâneye kadar o büyük
meydan ulemâ ve talebe-i ulûm ve sâir sunûf-ı nâsdan emsâli nâ-meşhûd bir izdihâmgâh-ı mâtem olarak orada bir
cemm-i gafîr ile edâ edildi. Na’ş-ı mübâreki esâbi’-i ihtirâm
üzerinde Edirnekapısı hâricine nakl olunup İbn-i Kemâl
*
Abdurrahman Efendi, Mahkeme-i Temyîz Re’îsi ve Ahkâmü’l-evkāf müellifi merhum Ömer Hilmi Efendi’nin pederidir.
6 SIRÂTIMÜSTAKĪM CİLD 1 - ADED 1 - SAYFA 7
merhûmun ziyaretgâhı civârında vedî’a-i hâk-i rahmet kılındı. –Nevverallâhu madca’ahû–
Merhûm-ı müşârun-ileyhin telâmîzinden
ve Mahkeme-i Temyîz a’zâsından
İsmâil Hakkı
MEVÂ’İZ
Nam-ı kemalât-ittisâmı bütün âlem-i İslâm’ı dolduran
mâ-bihi’l-iftihâr-ı ümmet şeyhu’l-hutebâ, mefharü’l-fuzelâ
Manastırlı İsmâil Hakkı Efendi hazretlerinin Ayasofya Câmi’-i Şerîfi’ndeki takrîrât-ı hakīmânelerini birkaç seneden
beri zabt u tahrîr eylemeğe hasr-ı mesâ’î ve vakf-ı gayret eylemiştim. O hakāyık-ı İslâmiyye’nin o beyânât-ı âliyenin Ayasofya’nın mütefekkir, mehâbet-nümûn kubbeleri altında
in’ikâsler husûle getirerek sönüp gitmesine gönlüm bir türlü
râzı olamıyordu. Bu sâ’ik-ı ma’nevî ile bütün ihvân-ı hakīkati bu füyûz-ı irfândan müstefîz etmek şevk-i vicdânîsiyle
birkaç sene zarfında ikibin sahîfeden ziyâde mühim bir eser-i güzîn vücûda geldi. Birkaç ay mukaddem “Mevâ’iz”
ünvânı altında iki dersi, pişdâr-ı hürriyyet olarak, müdrikearâ-yı yakâzat oldu. Bütün lisân-ı ümmet, bütün lisân-ı hakīkat bir bîm-i tecessüsle kilitlendiği bir ân-ı te’ellüm-nümûn, bir zamân-ı mukassîde büyük bir dehâ-yı irfân, büyük
bir zekâ-yı san’atla hemen her şeyden bahse muvaffak olan... cereyân eden elîm vukū’âtı, önümüzde açılarak bizi
cevf-i zalâmına çeken girdâb-ı dalâleti, bütün ahvâli, bütün
avâkıbi ... hikâyeler şekline koyarak, ta’bîrler îcâd ederek,
bin türlü îmâlarla göstermeğe gayret eden, efkâr-ı ümmeti
başka bir sâha-i tefekküre sevk etmeğe çalışan, halka-i nasîhatında bulunan bir çok efrâd-ı milleti zâhir-perestlikden
teb’îd, ciddiyete takrîbe muvaffak olan o tabîb-i ahlâk, o
nâşir-i hidâyet, o hatîb-i ’âlîye bilmem ki nasıl şükr edelim?..
Hele hürriyetin lisanlara, kalemlere bir küşâyiş-i tâm bahş
ettiği zamandan beri hazret öyle cûş ü hurûşa geldi ki lisânından hikmetler dökülür, fikrinden bârikalar zuhûr eder.
Üç-dört haftadır Ayasofya’nın hâlini görmelisiniz. Üç-dört
bin teşne-i ma’rifet kalblerin şevki, ihtisâsı ol derece gale-
CİLD 1 - ADED 1 - SAYFA 8 SIRÂTIMÜSTAKĪM 7
yâna geliyor ki insan kendini bir başka âlemde zannediyor!.. Allah ömr-i fâzılânelerini müzdâd buyursun...
Şimdiye kadar zabt ü tahrîr olunan dersler 49’a bâliğ oldu. 46. dersden i’tibâren zabt edilen dürûs-ı ahrârâne, Hazret-i üstad-ı muhteremin ayrıca nazar-ı tashîh-i hakīmânelerinden geçtikden sonra, inşâallahu te’âla her hafta Sırâtımüstakīm’in sütûnlarını tezyîn edecektir. Üçüncü ve mâ-ba’-
di dersler de pey-der-pey evvelki matbû’ dersler gibi kitab
şeklinde intişâr edecektir.
Hazret-i üstâd-ı muhteremin Mekteb-i Hukūk’da tedrîs
buyurdukları ilm-i usûl-i fıkha müte’allik takrîrât ve teşrîhât-ı
mû-şikâfâneleri taraf-ı acizânemden aynen zabt ü tahrîr olunarak ikibin sahîfeye karîb vücûda gelen eser-i kıymetdâr
da yakında Sırâtımüstakīm’de intişâra başlayacakdır. Ve mina’llahi’t-tevfîk.
Sirozlu: Hâfız Eşref Edib